[ الله معك يا وطن… طمني عنّك ؟ دموعك نشفوا؟ عطيوك مأذونية تترتاح وتمسح دموعك بحضن إمك ]
عناصر من الجيش اللبناني تبكي وجعاً على الوطن
كيفك اليوم؟ إنشالله تكون إرتحت؟
طمني عنك اشغلت بال العالم؟ دموعك نشفوا؟ أعصابك راقوا؟ عطيوك مأذونية تترتاح وتمسح دموعك بحضن إمك أو بعدك بالخدمة كرمال مهمة ثانية بالساحة ذاتا وتشوف بعيونك المدمعين الناس ذاتن؟!
خبرني يا وطن شو اللي وجعك؟ شو اللي بكّاك هالقد؟ مين عملك هالغصة؟ مين جرحك؟ ليش ما إستعملت القوة؟ ليش ما إستعملت سلاحك؟ ليش ما نفذت الأوامر؟ مين وقف بوجك؟ بعرفك مش جبان مرق عليك كتير معارك من نهر البارد وشاكر العبسي لجرود عرسال وأبو مالك التلة وبكل معركة كنت تعمل عرس وتصنع مجد شو صار معك مبارح بجل الديب وبالزوق؟ ليش تراجعت؟ ليش بكيت هالقد؟ شو كان بدك تقول وعلقت الكلمة بتمك من كثر الوجع؟ شو اللي زعّلك هالقد وخلاك تتراجع وتنزوي وتشارك السما بدموع السما؟!
شفت قدامك رفقاتك بعرسال اللي إنخطفوا وإندبحوا والمسؤول عنن كان يوعد إماتن إنو ما رح ينام قبل ما يشوفن أحرار وهوي عارف إنن صاروا عند ربُّن برتبة شهيد؟ شفت السكين اللي إنمدت ع رقابن ودبحتن عم تنمد ع رقاب أهلك قدّامك وهالمرة بدّن السكين تكون بإيدك؟!
شفت قدّامك مسؤول كذاب سرق الوطن منك وبدّو ياك تحمي؟ شفت قدامك اللي سرق حلم ولادك وخان شرفك وتنكر لتضحياتك وباع وإستغل وفاءك عم يحكي بالشرف ويحاضر بالوطنية؟! شفت قدامك اللي سرق وطن بإمّو وأبو وجايي اليوم يكفي عالباقي؟!
بعتقد هودي قاسيين كتير وببكوا الحجر بس معقول يخلوك تتراجع وتستسلم وترفض تنفذ الأوامر؟ بحياة شرفك خبّرني يا وطن ليش هالقد إنقهرت حتى إنفجرت، يا الله شو صعبة عالرجال يبكوا!!!
شفت قدامك إمك عم تحط بجيبتك آخر قرش معها تتوصل إنت عالخدمة وهي تطوي النهار كلو ع لقمة خبز؟! شفت مرتك واقفة عالباب الصبح قبل طلوع الفجر عم تودعك وما بتعرف إذا بترجع أو لأ وكانت همسة بدينتك إنو البرّاد فاضي والشهر الماضي سلقِت رز ورضّعت بنتك الزغيرة زوم الرز لانو ما في حليب؟ شفت ولادك نايمين بفرشتهن عم يحلموا بالعيد وفي حرامي واقف ع باب مستقبلهم سرق منن أحلامن؟ أو تذكرت قسط المدرسة اللي إنكسر عليك لأنو بالهندسات المالية طلع معن ينزلوا المساعدات المدرسية من ٨٠ بالمية لل ٣٠ بالمية وما عم تندفع؟! أو تذكرت إنك بلا بيت لأنو الشباب كمان بالهندسات المالية وقفوا إسكان الجيش والإسكان المدني أو يمكن مكسور عليك الأجار ؟!!
أو شفت إختك اللي تعلمت وتخرجت قاعدة بالبيت ناطرة الفرج والفرج بعدو بعيد؟
أو شفت خيّك هوي وعم بيودعك عالمطار لأنو لقى حالوا أقل من لاجىء بوطنو وصرت تحلف بغربتو لأنك من دونو صرت من دون جناح؟!
أو شفت بيّك حاملك ع كتافو إنت وصغير وشايفك ومش مصدق وهلق إنت مش قادر تحملو لأنو تحاملوا عليك وتذاكوا ع معاشك مدو إيدن ع تعويضك وضماناتك وكرامتك وعزة نفسك؟!!
شو اللي قهرك هالقد؟ شفت وطنك عالأرض عم ينضرب بعصا حراسو… عم يدعوس بإجرين ملوثة بدم الشهدا رفقاتك… عم ينشرب دمو بقلب بارد..
هالقد إنقهرت وإنوجعت تالكل إنقهروا وإنوجعوا وبكيوا متلك ويمكن أكتر…
تسلم يا وطن ….
دموعك… دموع كل الوطن
(منقول)
{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}
{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}
تعليقات
إرسال تعليق
{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}
{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}