زوادة يوم ٢١ تشرين الثاني ٢٠١٩/المعاهدة مع الأسد… واللي بجرّب المجرّب/

[ المعاهدة مع الأسد… واللي بجرّب المجرّب ] 

بخبرو عن غابة فيها أسد مفترس، كان كل يوم يتصيّد طريدة لحتى ياكلا، وصار في عداوة بينو وبين كل الحيوانات، لَ بيوم من الإيام قرّر يعمل معن معاهدة سلام، وطلب منون إجتماع وقلن ،عندي طرح ، كل يوم بتقدمولي حدا مريض أنا باكلو. 

وهيك أنا ما بكون عم باكول الشباب والأصحاء إنما المرضى…

بس بيوم من الإيام كان في حيوانات تنين، حاملين حيوان مريض تَ يقدموه للأسد ت ياكلو... 

الأسد بياكول الحيوانات التلاتي..

بيجتمعو الحيوانات وبقولولو للأسد، إنتا خالفت العهد، وأكلت تلاتي منّا… في تنين منون مش مرضا..

جاوب الأسد : بنظركم إنتو منن مرضا، بس بالنسبة لإلي إنتو كلكم مرضى. 

الزوادة اليوم بتقلّي وبتقلّك :

بحياتك ما تعلن معاهدة مع مُجرّب، لأنو كذاب وأبو الكذب، ما بتعرف أيّة ساعة بينقلب عليك…

خلّي عهدك مع الرب لأنو أمين، وعهدو ثابت للأبد…

والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}