زوادة يوم ٥ كانون الأوّل ٢٠١٩/موقف عجيب/

[ موقف عجيب ] 

بيخبرو عن رجّال كريم كتير، كان كل يوم يوقف ع شبّاك قصرو، وكل إنسان بيمرق تحت الشبّاك، بيكبلّو قطعة من الدهب.

وهيك كانو الناس، من كِترة فرحُن، يلمّو الدهب ويكمّلو طريقُن، بلا ما يتطلّعو فوقُن ويشكرو العاطي.

وبيوم من الإيّام عصّب كتير، وقرّر يرشقُن بالحجارة بدل الدهب... وشو كانت دهشتو كبيرة، لـمّا صارو يلمّو الحجارة ويتطلّعو فيه ويلوموه.

تعجّب هالرجّال الكريم وقال :

«بضربهُن بالدهب ما بيطلّعو... بضربهن بالحجارة بيطلّعو».

الزوّادة بتقلّي وبتقلّك :

«هيدي حالتنا مع الله، بيقدّملنا كل الخيرات لا منطلّع فيه ولا منشكرو ع عطاياه... بيسمح بالتجربة منصرّخ بوجّو ومنعتب عليه». والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}