زوادة يوم ١٩ كانون الأوّل ٢٠١٩/من حياة ودعوة القديس الخوري آرس …./

[ من حياة ودعوة القديس الخوري آرس …. ] 

جان ماري كان طالب الكهنوت، والمطران كان رافض يرسمو كاهن لأنّو ما كان أبدًا شاطر باللّاهوت، قلّو :

«يا خيّي اعذرني ما بقدر إرسمك كاهن وإنت حمار باللّاهوت».

بيجاوبو جان ماري :

«يا سيّدنا، شمشون بالعصور الماضيه كان معو سرج حمار وإنت بتعرف شو قدر عمل بواسطتو.

هلّق في بين إيديك حمار كامل جرّبو وشوف شو بيقدر الرب يعمل بواسطتو».

إقتنع المطران ورسم جان ماري كاهن ولكن عيّنو بضيعه بعيده إسمها آرس.

وقدر الكاهن اللي سمّى حالو حمار، قدر يحمل يسوع لكلّ أهالي آرس ويقدّسن، بالوقت اللي كانو فيه الفرنسيين بذروة ثورتن ع الكنيسه والإكليروس.

من وقتا صار معروف جان ماري بخوري آرس، وصار قدّيس.

الزوّاده بتقلّي وبتقلّك :

إذا حبّيت تنقل يسوع لغيرك ما تقول أنا ما بفهم باللّاهوت قول يا رب أنا بين إيديك استعملني ت إحملك للعالم. والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}