زوادة يوم ٢ كانون الثاني ٢٠١٩/مين بيشتري إمّي؟/

[ مين بيشتري إمّي؟ ] 

بيخبرو عن قصّة صارت بضيعة من ضيع أفريقيا، لـمّا قرّبت العروس من عريسها قبل الإكليل وقالتلو :

«الليلة بعد الإكليل ما تطلب منّي وقت العشا إقعد حَدّ إمّك ع الطاولة».

العريس ما جاوب، وما حكي ولا كلمة.

قبل ما يبلّش الإكليل بيطلب العريس من الكاهن يعطيه الميكروفون، بيسأل الكل وبيقلّن :

«مين بيشتري إمّي؟»

الكل تعجّبو من السؤال، بيرجع العريس بيسأل تلات مرات، بس ما حدا بيرِدّ، بيعتذر من الحضور ومن الكاهن، وبيقلّن :

«أنا اشتريت إمّي»…

بيمسك إمّو بإيدها بيطلع من الكنيسة، وبينلغى العرس.

القصّة ما خلصت هون، بيسمع وزير بقصة هالشبّ، بيجي لعندو وبيقلّو :

«أنا حابب تكون صهري، لأنّك أكيد رح بتحافظ عليّي وع بنتي وع مرتي، ومش بس ع إمّك».

الزوّادة بتقلّي وبتقلّك :

«أهلنا كنز كبير، تعبو حتّى ربّونا وكبِرنا… إجا الوقت حتّى نبادلهُن المحبّة بمحبة، ونتذكّر وصيّة الرب أكرِم أباك وأمّك، ويلّي أهلو بيرضو عليه السما والأرض بيرضو عليه» والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}