زوادة يوم ١٠ كانون الثاني ٢٠٢٠/باب السما/

[ باب السما ]

شي مرة فكرتو كم باب منفتح بالنهار!؟ باب البيت، باب الخزانة، باب المكتب، باب الصف، باب السيارة…في بواب بتفتح بمفتاح، في بواب أصعب بتفتح ببصمة الإيد، و في بواب بعد أصعب بتفتح بأرقام سرية و في بواب هينة ما بتكون مقفلة أصلاً.

مش ناسيين شي؟ معقول هودي هني بس بواب حياتنا؟! في بواب السما قليل تا حدا يفكر يفتحن مع إنو كل واحد منا معو نسخة من المفتاح! هني كلمتين : يا رب! هالعبارة بتفتحلك بواب السما عا شرط تكون بتعنيا و عم تقولها من قلبك! متل ما ربنا مأمننا عا مفاتيح ملكوتو ليش نحنا ما منأمنو عا مفاتيح قلوبنا؟ ما تخافو تسلمو حالكن للرب و شوفو كيف كل شي بيتيسر.

دعوتنا إلكن اليوم توحدو الصوت و بالعالي قولو معنا :

يا رب يا رب يا رب إنت اللي قلت إقرعوا يفتح لكم…و الله معكن...



{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}


{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}