زوّادة يوم ١٤ آذار ٢٠٢٠/عمق الأمور/

[ عمق الأمور ] 

مرّة زلمي صوّر غزال عم يقطع الطريق وإنتشرت الصورة وصارو الناس يعَلقو عليها إنّو حرام الغزال ليش عم يقطع الطريق يمكن تفوت فيه سيّارة وهيك إشيا.

بس ما حدا فكّر يعلّق مثلاً : ليش في طريق عام بالغابة؟ ليش خرّبو البشر بيت هالغزال اللي ما رح يعرف إنّو الزفت خطر عليه؟

أوقات في صُوَر و مواقف وراها في إشيا أعمق بكتير بس الناس مِتعَودين يشوفو اللي مبيّن، قليل اللي بيفكّر أكتر من ما مطلوب ومن اللي شايفينو عيونو!

الزوّادة اليوم بتقلنا :

انّو يسوع حكانا بالأمثال حتّى يعلّمنا نحلّل و نفكّر ونشوف عمق الأمور!

عطينا يا رب مواهب روحك القدّوس بهالصوم المبارك وخصوصاً موهبة الحكمة حتّى نشوف و نفهم و نتصرّف عهالأساس! الله معكن...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}