زوّادة يوم ٢٩ أيّار ٢٠٢٠/المجاعة عنّا/

[ المجاعة عنّا ] 

بتقول القدّيسة الأم تريزا دي كالكوتا :

"تسألوني متى ينتهي الجوع في العالم؛ وأنا أجيبكم: عندما نبدأ، أنت وأنا، بتقاسم ما هو موجود."

من نحنا و زغار منسمع جملة ما حدا بيموت من الجوع، و منشوف بالكتب صورة الطفل الأسمر الضعيف الشهيرة اللي مكتوب تحتها: المجاعة في إفريقيا... بس مش مزبوط!

وقت تشوف بَي عم يسرق قطعة جبنة من الدكّان تا يطعمي إبنو، وقت تشوف شبّ عم يسرق ربطة خبز تا يطعمي أهلو، وقت تشوف مهندس عم يطلب شغل بمحطّة بنزين تا ياكل، بس تشوف إم عم تطلب مساعدة تا تجيب حليب و حفاضات لطفلها... أعذرونا...  مبلا الجوع بيموّت و المجاعة عِنّا مش بأفريقيا!

كلنا ثقة إنّو الله ما بيترك حدا، و كلنا إيمان برحمتو و محبتو، هوّي اللي قلنا كنت جائعاً فأطعمتموني... منشوف الفقراء عم يتقاسمو حبّة الزيتون و الأغنياء مسكرين دينَيهن بقصورن فوق!

عا أمل صرختنا توصل لضمير الكل! و الله معكن...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}