زوّادة يوم ٩ حزيران ٢٠٢٠/أضواء الشهرة/

[ أضواء الشهرة ] 

بيخبرو عن شب عم يقول شو بحب كون مشهور والناس يصرخو إسمي بس يشوفوني، جرّبت إمّو تفسّرلو إنّو ما رح يحبّ جَو الشهرة بس ما إقتنع. 

راحت الأم كتبت عا ورقة : إذا بتريدو زمرو وصرّخو مرحباً جاد، عم بعمل مقلب بإبني، و لزّقتها عا صندوق سيارتو.

تاني يوم الصبح هوّي ورايح عالجامعة صارو هالناس يزمرولو و يصرخولو جاااددد، مرحبا جاددد! 

إستغرب هالشب كيف كلّن عرفو إسمو، بالأوّل كان عاجبو الموضوع بعدين بلّش ينزعج بعد مسافة وشوي عجق السير قدّامو وما يسمع إلّا زمامير وصريخ بإسمو، عصّب وما عرف كيف وصل عالجامعة.

هوّي ومارق ورا السيّارة شاف الورقة! 

صار يضحك عا فكرة إمّو وإقتنع إنّو معها حقّ! 

الزوّادة بتقلّي وبتقلّك :

اهلنا بيعرفو أكتر منّا وربنا ما قلنا أكرم أباك وأمّك عالفاضي! والله معك...

{نرجو ممن يرغب بإضافة تعليق، صياغته بلغة لائقة بعيدة عن القدح والذم والتحريض المختلف أو المسّ بالكرامات.}

{إنّ التعليقات المنشورة لا تعبر بأي شكل من الأشكال عن رأي مواقع "خدام الرب" التي لا تتحمّل أي أعباء معنويّة أو ماديّة إطلاقًا من جرّائها.}